News vo Kanada

Gstartet isch de Tag hüt scho am 5i. Mir (Carmen, Papa und ig) si am 0530 abgfahre für uf Züri a Flughafe. Dert aacho afe mou iicheckt und när no es letzts schwizer Kafi gnoo. Bi aune verabschide und ab dür d Sicherheitskontroue. Direkt hinger de Sichertheitskontroue hani de ou scho mi "Flugbegleiter" de Micha Blindenbacher troffe; e angere schwizer Trainee wo fasch am gliche Ort hii geit go schaffe wie ig. Vo Züri ischs när uf Frankfurt, derte gschwing Gate wächsle und witer uf Vancouver. Ganzi 10h und 20min isch dä mFlug gange, das miechi freiwöuig äuä ou nümm so schnäu. Naja miteme lääre Platz näbe mir und es paar Fiume ischs du de glich ushautbar gsi. Z Vancouver aachoo isch s Cabaret losgange. Zersch afe mou direkt zude Witerflüg gwatschlet obwou mer no hätte is immigration-office söue. Auso aus wider zruggloufe (u dä Flughafe isch nid chlin) und s Visum go abhole. I däm Immigration-office häts meh aus 20 Schauter gha, gschaffet het aber nur öbber. Entsprechend lang isches när ou gange bismer üsi endgiutige Visumsbriefe hei bechoo. 1610 simer losgsecklet richtig Gate. Ar Sicherheitskontroue hetme aus schwizer schowider fasch müesse überbisse so ineffizient wie das gange isch. Nichts desto trotzt heimer müesse witerseckle zum Gate. U dert ischs när choo wies het müesse. Mir si 1638 dert gsii u hei nümme chönne iistige für am 1640 z flüge...

Am Kundeschauter vo Air Canada heimer aber när d Tickets chönne tusche gägene Flug wo am 2045 geit. Glück im Unglück, wenigstens müessemer nid am Flughafe schloffe. Jetz müessemer haut defüür chli lenger ufe Flug warte, so hani grad Zyt dohie öbbis inezschribe.

Zersch no gschwing de Räste vo gester: Nach däm chline Zwüschefau isch dä Tag no guet z'änd. De Flug vo Vancouver nach Fort st. John isch ou no guet gange. Dert bini när vode angere 2 Trainees wo uf de gliche Farm schaffe wie ig abghout worde. Nach ca. 35min Fahrt simer de ou scho uf de Farm aachoo, woni müglechst schnäu is Bett bi, da ig scho afe rächt müed bi gsi. Hüt ischs när am 8i losgange mit de Arbeitsverteilig. Mir si grad dranne aui Maschine fürs Säie vorzbereite. Ig ha vorauem e Schibeegge zwäggmacht. Zmittag und znacht hei mir 3 Trainees säuber kochet, es isch erstunlech guet choo. Die Aagsteute, d Farm und augemein s Klima het hüt emu afe rächt e guete Iidruck gmacht, i fröiemi uf das aus wo no chunnt.

Hüt hani witer Maschine für d Saison vorbereitet. Aagfange miteme Stapler, witergmacht när miteme Service am Vertsatile 550. Gäge oobe heimer när no Förderschnegge für d Silo füregnoo, testet und Service gmacht. De Versatile isch scho no speziell gsii, aus so riesig. Zum Bispiu scho nume s Motoreöl, nid wie bi üs so um die 20 Liter bimne 6 Zylinder, nei hie sis um die 45 Liter. Liegebrett bruchsch nid wiu ungerem Chare chasch chnöile, we ufem Liegebrett liisch masch gar nid ueche. Am Oobe isch när no e angere schwizer Trainee choo wo scho lenger z Kanada isch und eine wo hie schaffet guet kennt. Znacht hets schwizer Fondue gää. Mir heis guet gha, gjasset und Black Jack gspiut bis spät id Nacht. Bis mer plötzlech dusse d Nordliechter gseh hei. Die simer natürlech när no gneuer go aaluege, öbbis wunderschöns!

Das Wucheend si mir 4 schwizer uf Dawson Creek as Rodeo. Für derthäre heimer müesse übere Peace River fahre, sehr e schöni Landschaft und nid so Kahl wie süsch s flache Kanada. Aus ersts heimer im Hotel iicheckt und si när grad as Rodeo. Das het ire umfunktionierte Ishockey-Halle stattgfunge. Sones Rodeo isch sehr intressant, öbbis serigs chönntme sich bi üs nie vorsteue. I mues aber scho säge, was die Cowboys miteme Rope und emne Ross aus chöi macht Iidruck. Sigs wiudi Ross ohni Sattu ritte, Kälber innert chürzister Zyt mitem Rope iizfoh und z fessle oder äbe de d Spitzedisziplin: Bull-Riding. Wo de Wettkampf fertig isch gsi isch no Fest gsii. Dert simer säubstverständlech ou no chli verwilet. Am Sunnti simer ufem Heiwäg no go iichouffe, dasmer ou nechst Wuche immer wüsse wasmer ässe. Scho allei sone "Walmart" isch öbbis angers aus bi üs es Migros oder es Coop. De Lade isch riesig und d Packige vode Läbesmittu ou. Die chlinsti Mayonnaise zum Bispiu isch 1Kg nid e Tube wie mers kenne.

Die Wuche isch s Säie losgange. Am Mittwuch für gnau z sii. Mänti/Zisti heimer no aus parat gmacht. Lastwäge, Traktore, Säimaschine, Förderschnegge usw. Di eint Säimaschine isch no nöi, dert hani no de Kabuboum und d Display und aus drum und dra installiert am Claas Xerion.

Am Mittwuch ischs de äbe loosgange. Für die nöi Säimaschine si no paar Lüt cho e Iifüehrig gää und häuffe iisteue und so witer. Am Friti Morge hani de chönne übernääh und bi mit dere gfahre. Mir si am Weize Säie, aagfange ufeme guet 500 hektare grosse Fäud. Ig und e angere Schwizer si mit de Säimaschinene gfahre, 2 Kanadier hei mit Lastwäge Saatguet und Dünger brocht. Au Tag vom 8i am Morge bis am Oobe mindestens am 10ni. So geit das jetz wahrschinlech bis ca. mitti Mai wenn s Wätter mitmacht. Zäme heimer vom Friti bis hüt Sunnti scho um die 750 hektare gsäit. Die zwöi Säimaschine si 60 und 70 foot breit, sprich ca. 18 und 21m. Hüt heimer de müesse scho öbbe am 8i abbreche wius het aafoh rägele. So wie d Wäterbrichte usgseh wirds Mänti/Zisti äuä ou nümme mit Säie, aber das wird sech de zeige. Süsch machemer haut de afe no chli Räge-Büetz, dasmer de wenns troch isch wider chöi aafoh.

Wie aatönt hets Mänti/Zisti ou nid durchgehend funktioniert mit Säie wägem Wätter. I dere Zyt simer haut chli ir Werchstatt gsii. Uf somene riese Betrieb giz immer öbbis z flicke oder vorzbereite. Am Mittwuch ischs de wider so richtig losgange. Sither fahremer jetz 2 schichtig, dasmer müglechst bezitte fertig wärde. E angere fahrt vom 0400 bis 1400 und ig fahre när vom 1400 bis am 12i ir nacht, oder mängisch wenns ums fertig mache vomene Bitz geit ou chli lenger. So chömemer jetz rächt vorah und wenns s GPS grad nid spinnt loufts eigentlech rächt riibigslos. Isch jetz haut e chli eitönigi Büetz, vorauem bi dene schier nid ufhörende Fäuder. Bishär ischsmer aber grad noni verleidet. Viu meh chani im Moment gar nid schribe, wiu usser Tag ih, Tag uus säue machemer eig nid viu. Mit Weize simer hüt fertig worde, Raps noni ganz und eine het jetz aagfange mit Hafer säie.

Witer geiz mit Säie. Es nimmt und nimmt schier kes Ändi. Hafer simer mittlerwile o fertig und bim Raps geiz sträng am Ändi zue.

Chuum chunnt de Früelig chli füre föh d Waudbränd schowider ah. Im Radio ghört meh au Tag wisi Dörfer evakuiere und das hunderti vo Hektare Waud brönne. Si säge aber d Füür sige unger kontroue, emu grössteteus. D Kanadier wärde do gar nüt närvös, dasch normau hie. Ir nöchere Umgebig brönnt zum Glück no nüt. Trotzdem gsehtme gäng nöime wider chli Rouch ufstiige. Am Wucheend isches am schlimmste gsi mitem Rouch, grad denn wome so guet hät d Nordliechter gseh...

Mittlerwile heimer aber wider klari Sicht und de Alltag geit ungstört witer.

Letzt Wucheend hets de när äntlech mou chli richtig grägnet, jetz isch nid schlecht, oder mir müesse emu grad nümm sefu angst ha es chiem de nüt vo dem womer gsäit hei.

Die Wuche isch ganz im Name vom Wäsche u wider parat mache gstange. Säimaschine, Pflueg, Traktore, Lastwäge usw. aus het müesse gwäsche wärde dases vo dem viele Dünger nid grad devoorostet. Nachem Wäsche när aus schmiere, kontrolliere, flicke u bide Fahrzüg isch schowider e Service noche nach de Säisaison. Überau luege was kabutt isch, wases brucht füre Service usw. so dass de Chef aus cha bsteue. Es isch nümm so sträng vode Arbeitszyte häär wie vorher, aber no grad so spannend, ou wemer nur ufem Hof sii. Zudem het s Sprütze scho aagfange, de Weize het de Chef afe aus säuber gmacht, aber bim Raps heter gmeint woter üs de zeige wie dasmer ou chli chöi goo. I bi gspannt u fröiemi uf aus wo no chunnt.

Ah und fasch vergässe, am Mänti si mir 2 Schwizer no uf Grande Prairie, das isch öbbe 2h 30min vo hie, go Teili hole und bsteue. Dert hets vo Ritchie Bros no es Grosses Areal mit Maschine wo aui z versteigere si. Unheimlech was dert ume steit, vo Rasemäuer über Bagger, Autos, Lastwäge bis hin zu Traktore, Mäidröscher und Forstmaschine hets aus wo z versteigere isch. Vo Nöimaschine über gueti occasion Maschine bis hin zu absolutem Altiise. Es riese Areal, wome ar Aameldig e Lüchtweste cha go hole u sech när e ganze Tag verdöörle i dem Areal, d Schlüssle stecke aui, chasch aus beguetachte und probefahre.

Die letzte Wuche isches vorauem ume Pflanzeschutz gange. Mir si au Tag wos gange isch vo früeh bis spät am Sprütze gsii. Am Aafang de anger schwizer und die letzte 2 Wuche när ig. S meiste heimer mit Totalherbizid gsprützt, usser paar einzelni Bitze. D Sprütze isch e John Deere mit 36m Sprützbalke, do bringt me rächt Flächi düre amene Tag. Ganz fertig simer noni mit Sprütze, aber s wichtigste isch gmacht und es geit am Ändi zue. Wemer Wetterbedingt grad nid am Sprütze si gsii, hets ir Werchstatt immer gnue z tue. Grundsätzlech heimer aber sehr guets wätter mit durchschnittlech ca. 1 Rägetag ir Wuche.

Am Mänti isch no s aues entscheidende 7. Spiu im Finau vom Stanley-Cup gsii. Das simer aui zäme zumene Kolleg vom Chef go luege wo e Art Public-Viewing veraastautet het. Es het viu sehr aagfrässni Lüt gha dert, di läbe s Hockey hie no chli meh aus bi üs. D Enttüschig isch när aber ou umso grösser gsi wo die kanadische Edmonton Oilers gäge di amerikanische Florida Panthers hei verlore. Jetz sis scho 31 Johr wo ke kanadischi Mannschaft meh de Meistertitu ir NHL het gwunne...

Unger de Wuche hani när no aues fertig gsprützt, d Sprütze gwäsche und när uf Dawson Creek i Service brocht und de heisi no grad Pflegebereifig druf doo. Süsch machemer eigentlech bi aune Fahrzüg de Service säuber, aber bider Sprütze heter e Wartigsvertrag bi John Deere. Am Wucheend simer när zumene angere Schwizer ufene Bison-Ranch. Er isch Metzger und het dert e eigene Schlachthof gha woner Bison und Rindfleisch het verarbeitet. D'Ranch schiint fasch Endlos, überau hets chli Chüeh und chli Bison. Znacht heimer när natürlech ou e aaständige Bitz Fleisch bechoo und no chli s Wucheend bi ihm gnosse.

Die Wuche bini vorauem ir Werchstatt gsii. D Schwadmäier parat mache und e Service am nöi aagschaffte Cat Challanger. V12-Motor!

S Wucheend heimer när miteme junge vom Nochbersbuur am Beaton-River ganz ir nöchi vor Farm verbrocht. S schönste Wätter heimer gha, S ischmer fasch chli vorchoo aus wäremer ar Aare ghocket, usser dass s Wasser niso suber isch gsii.

Die Nechst Wuche hani Klimaalage-Wuche gha. De Chef het usegfunge dasi Klimaalage cha und darf flicke, so bini bau die ganz Wuche beschäftiget gsii. Diversi Pickuip, Traktore, Autos, Schwadmäier und sogar Wohncontainer hani müesse flicke. Jetz chame wider im chüele hocke, umso meh ha ig aber bim flicke gschwitzt, s isch nämlech au Tag über 30°C gsii. Am Donnsti simer när abgfahre uf Calgary für dert as Calgary Stampede z goo. Es riese Erlebnis isch das gsii "The greatest outdoor show on earth". De Donnsti heimer de ganz Tag verbrocht mit fasch 1000km fahre bismer de nach 10h Fahrzyt äntlech si aachoo. De simer no go znacht ässe u de isch dä erst Tag Calgary ou scho düre gsii. Am Friti simer när nachem Zmorge grad ufs Stampede-Areal, da mer hei Tickets gha fürs Rodeo nachem Mittag. Nebst em coole Rodeo ischs hie im Verglich zu angere Orte no rächt viu Show gsii. Nachem Rodeo heimer i däm riesige BEA-ähnleche Areal öbbis zmittag gnoo u si när schowider id Arena für d Oobeshow.  Dert sisi Renne gfahre mit Ross und Wage, hei Konzert gsunge, mit Töffe e Show gmacht und zum krönende Abschluss no es riesigs Füürwärch abgloo. Nachdem simer no chli ir Bar verwiilet womer am Schluss 9 Schwizer si gsii womer aui troffe hei.   Am Samsti simer i gröst Western-store vor Wäut, i Bass-Pro Shop und allgemein chli de Touriste Sache z Calgary noche. Am Sunnti de no die schier endlosi Heimfahrt. Nöchi Edmonton heimer tanket für 1.44, umgrechnet 94 Rp/L.

Die Wuche heimer aagfange Trichter für üsi Silos ufem Hof zämeboue. Dert sette de mou d Silo drufgsteut wärde. Isch e rächti Büetz, vorauem bi meh aus 30°C. Glichzytig heimer aagfange Schwadmäie. Es geit afe ums Fascue, aber scho glii geiz los mit auem angere wenns nümme gross chunnt cho seiche. Am Wucheend heimer e chli Räge gha, sogar chli ghaglet und gstürmt hets. Niso guet so viu Blitze nach so langer Tröchni. Fazit; In BC hei Blitze 308 Wildfires entzündet. Dementsprechend gsehtme ou immer wider Rouch, Strosse wärde gsperrt und Dörfer evakuiert. Üs betriffts zum Glück nid im Moment, hoffemer dases e so blibt.

Vorem grosse Drösche heimer no chli schwizer Bsuech gha uf de Farm. Das heimer aus Aalass gnoo e Schwizer-Oobe drus z mache. Mir hei brötlet, e Wettbewärb gmacht, Spieli gspiut usw. S isch sehr amüsant gsii. Churz drufabe ischs de när losgange. I ha grad chönne aafoh drösche. Zersch äbe Fascue, das heimer aues vom Schwad ufgnoo. Nachem Fascue de nomou e ganz churzi Verschnuufpouse u Zyt für d Schnidwärch zwäg z mache. Gross Pouse heimer aber nid gha, denn aus womer wei drösche mues entweder no Schwadgmäit oder gsprützt werde. I bi ufem Schwadmäier gsii grössteteus.  Dert simer mit 2 Schwadmäier ungerwegs gsii, vo früeh bis spät. So heimer z 2. am Tag ca. 200 ha härebechoo. Nach ca. de heufti bini de när abglöst worde ufem Schwader und ha wider chönne go drösche. Aagfange bide Erbse, witer mit Weize, Hafer und när no Raps. Guet d heufti vom Betrieb isch Raps, do simer ou no gäng dranne. So 5000 ha sprütze, Mäie u drösche zieht sech haut scho no chli. Es isch aber au Tag intressant, es loht gäng öbbe öbbis loh go oder öbbis geit nid wiemes wett usw. Es blibt uf au fäu au Tag intressant. Mi chönnt äuä scho fasch säge mir sigi am Schlusssprint vom drösche, obwohl sech dä no chli chönnti id Lengi zieh, langsam aber sicher macht nämlech s Wätter nümme gross mit u mir hei gäng öbbe wider e chli Räge wonis wider für 1-2 Täg stiuleit was drösche aabelangt. I dene Phase isch üs aber nid längwilig, jo mängisch ischme bau froh um se. Wiu irgendöbbis isch jetz auso gäng wo wider het loh goo u füre Moment no grad funktioniert, aber so schnäu wie müglech setti gflickt sii. Für genau serigi Sache wärde die Rägepousene de usgnützt. Am Oobe wirds scho wider glii dunku u när ou chaut. So zwüsche 1-5°C ir Nacht und 5-15°C am Tag. Defüür heimer fasch au Nacht Nordliechter...

Jo mou luege obmer no vorem Frost fertig wärde, mir si emu gäng dranne wes geit.

Mir heis auso no gschafft aues vorem Frost aus z drösche. Mir hei aber ke einzige Tag spatzig gha. Nachem Drösche hei mir 3 schwizer üs chli abgwächslet ufem Grubber, Mulcher und de dritt ir Werchstatt d Maschine iiwintere. Am Wucheendi und am Fürobe hani de när aube chli a mim Pickup und am Camper gmacht, aus testet und parat gmacht. Am 17.10 isch de när d Carmen choo vo denn ah hani när nümme gschaffet und de heimer z zwöit no de camper fertig iigrichtet und Putzt usw. dasmer üs de när wohl füehle bim reise i üsem nöie deheim. Am letzte Oobe hets no es Abschlussässe gää mit aune Aagsteute vor Farm, u när isch die schööni und erlebnisriichi Zyt uf de Marber-Farm für mii scho z änd gange.

Und los geit üsi Reis. Aus ersts afe uf Fort st. John de Chüeuschrank go ufföue und Proviant iichouffe. Vo dert när uf Dawson Creek womer üsi ersti Attraktion, d "Mile 0" vom Alaska Highway gseh hei. Dä foht nämlech dert ah und zieht sech när 2197km i Norde ufe. Dä isch 1942 houptsächlech vor US-Armee uf kanadischem Territorium bout worde, für e Verbindig zwüsche Alaska und de USA z schaffe. Die erste Nächt im Camper heimer de in Prince George verbrocht, womer u.a ou no Museum zu desse Gschicht und de Gschicht vode ursprüngleche Iiwohner vo Prince George, de Indianer bsuecht hei. Vo dert simer witer uf Williams Lake. Deu kenne vilech d Fernsehserie "Timber Kings" die handlet nämlech vo schwizer Blockhuusbouer wo äbe genau i däm Williams Lake ihri Hüser boue. Di simer de ou go bsueche und hei dert rächt langi und intressanti Gspräch mitem Beat chönne füehre. De Beat bietet ungerem Name unBEATable ou kürs ah wome säuber cha d Kunst vom Blockhuusboue go erlerne. Dert näme ou immer viu schwizer Teil, wo de uf Kanada s schwizer handwärch chöme cho erlerne. In Williams Lake simer de u.a ou no a Chimney Lake, lut em Beat isch dert s Wasser klar wie ir Karibik. I weiss nid öber rächt het, s Wasser isch emu glasklar gsi, aber i weis jo gar nid wies ir Karibik isch, auso chanis schlächt beurteile. Uf au fäu e wunderschöne See gsi, u usser üs kei Mönscheseele ir nöchi.

Vo dert simer de wider e chli Outo gfahre, bis uf Whistler. Z Whistler si damaus 2008 bide winter Olympia vo Vancouver die ganze Ski- u Schneesportarte ustreit worde. De Wäg uf Whistler füehrt es gfüeuht unändlech langs Tal düruuf, Ke Natelempfang, ke Stadt u nüt wit und breit, überau Indianer-reservat und s einzige Strosseschiud wome zwüschedüre gseht heissts druffe: "Warning, Grizzly Bear activity is high". Churz zämegfasst, nid grad iiladend zum go Campe. Drum simer äbe ou grad bis Whistlert gfahre, womer die nöchste Täg verbrocht hei.

Vo dert simer witer uf Vancouver. Ungerwegs simer no uf d Sea-to-Sky Gondola, mit dere chame vom Meer direkt ufe Bärg. D Landsdchaft ähnlet hie sehr am Wallis, weme sech s Meer wägdänkt. Het ou viu Wiiräbe gha. Z Vancouver heimer fasch e ganze Tag im Vancouver-Aquarium verbrocht. Am Oobe bim Iichouffe heimer de sogar no de Nico Hischier und de Timo Meier krützt, heis aber ersch z spät gmerkt dass sis si gsii. Am nöchste Tag simer de no ufene Hop on hop off Bus u hei so no chli öbbis über die riesigi Stadt chönne lehre u s wichtigste aus einisch gseh.

Witer geiz in richtig Jasper und somit Rocky Mountain Nationalpark. Ungerwegs heimer de no 2 mou gschloffe. Einisch z Kamloops und einisch z Clearwater. Dert heimer de no e schwizer Mitarbeiter vo mir uf de Marberg-Farm troffe u si mit dene no i Usgang. In Jasper aachoh heimer s erst mou s Usmass vode Waudbränd dä Summer so in Ächt gseh. Ca. d heufti vor Stadt Jasper ligt in Trümmer und de ganz Waud Südlech devoo isch abbrönnt. Wäge däm heimer de ou nid chönne Campe, da ke Campingplatz meh steit. Dämentsprechend heimer 3 Nächt imne Hotel gschloffe. I dere Zyt womer si dert gsii heimer das wo no übrig isch vo Jasper bestuunet, chli glädelet , go wandere und guet go ässe. Unheimlech weme das gshet was sone Waudbrand cha aasteue, vorauem weme bedänkt dass das jo au Johr passiert hie in Kanada. Ufem Wäg vo Jasper uf Lake Louise heimer gäng öbbe wider bimene Gletscher oder so aaghaute, e chlini Wanderig gmacht u die obligatorische Touriste-Föteli gschosse. Eim Ort isch es Outo näbe use, da's gschneit het u glatt isch gsii. Mit hei zum Glück ke zwüschefau gha. Mir hei de dene gschwing ghouffe, da üse Pickup vor e Winde het isch das die perfekti Option gsii dene usem Schlamassel z häuffe u glichzytig no grad üsi Winde z teste. Si funktioniert auso. Z Lake Louise hets de wider offeni Campingplatz gha, womer üs ou grad für die nöchste Nächt Iiquartiert hei.